2.3 Die eienskappe van 'n suksesvolle entrepreneur  (Page 3/4)

Die groei van die Bangkok Bank is ‘n monument vir mnr. Chin se entrepreneurskap. Toe die Tweede Wêreldoorlog eindig, was hy ‘n naïewe jongman. Hy het betrokke geraak in die stigting van die bank as gevolg van ‘n terloopse gesprek tussen hom en ‘n paar goeie vriende. Aanvanklik het hy gedink hoeveel pret dit sal wees om ‘n bankier te word, met baie geld om te spandeer. Die groei van die Bangkok Bank tot die reus wat dit vandag is, kan egter nie juis pret genoem word nie. Die eerste jare was maar moeilik en die suksesse wat bereik is, kan nie net aan geluk toegeskryf word nie. Mnr. Chin se vaardigheid, energie en visie het die bank se verhaal so besonders gemaak.

Met die beëindiging van die Tweede Wêreldoorlog het mnr. Chin besef dat daar uitstekende besigheidsgeleenthede was. Hy het Thailand se eerste finansieringsmaatskappy, die Asia Trust Company Limited, gestig. Dit het hoofsaaklik in buitelandse valuta (buitelandse betaalmiddele) handel gedryf. Sommer gou het dit Thailand se invloedrykste en betroubaarste bron van aktiwiteite in buitelandse valuta geword. Mnr. Chin moes baie hard werk en douvoordag opstaan om te sien wat die internasionale wisselkoerse is sodat hy die dag se kwotasies kon vertoon voordat die sakemanne by die werk opdaag. In ‘n ommesientjie was hy bekend as die beste plaaslike handelaar in buitelandse valuta. As iemand hom sou sê wat die koerse vir die pond, die dollar of die baht (die Thaise geldeenheid) is, sou hy onmiddellik, sonder om ‘n sakrekenaar te gebruik, ‘n kwotasie daarvoor gee.

Mnr. Chin se Asia Trust Company het aanvanklik gedien as agent vir Bangkok Bank, wat oorspronklik hoofsaaklik met Hong Kong en Singapoer sake gedoen het in valutahandel. Die bank het later kontantvloeiprobleme ondervind as gevolg van oorinvestering (te veel beleggings) in eiendomme. Mnr. Chin, wat ‘n aandeelhouer in die bank was, is versoek om die bestuur van die bank oor te neem. Hy het dadelik ‘n span deskundiges van sy Asia Trust Company gestuur om die bank te red. Hy het sy baie besigheidskontakpersone en –verbindings gebruik om groot transaksies te doen in internasionale sake, geldeenhede en lenings. Intussen het hy ook ‘n vertroueling, mnr. Rojanasthien, aangestel om die bank se interne bestuurstelsel reg te ruk. Mnr. Rojanasthien het behoorlike bestuurs- en rekenkundige beginsels toegepas om die bank se kontantvloeiprobleme op te los.

Onder mnr. Chin se bekwame leiding het die bank vinnig ontwikkel tot die beste plaaslike bank teen 1970. Selfs vandag nog is dit ‘n leidende internasionale bank.

Mnr. Chin was baie lief vir sy land. Hy het die Bangkok Bank se groei beskou as ‘n belangrike bydraer tot die groei in die Thaise ekonomie.

Hy het al die inligting gebruik wat na sy mening tot voordeel van die bank kon wees en het graag boeke gelees wat hom in sy daaglikse werk kon help. Hy het elke dag begin deur in sy kantoor die daaglikse verslae te lees en dokumente wat hy wou sien aan te vra. Hoewel hy ‘n ervare bankier was, was hy ontvanklik vir nuwe idees, want hy was vasbeslote om die groei in Bangkok Bank vol te hou. In 1978 – 79 het hy die ingebruikneming van nuwe tegnologie en elektroniese bankbesigheid ondersteun, asook die invoer van nuwe bestuurskonsepte soos doelwitbestuur en om werknemers toe te laat om aandele in die bank te besit.