2.1 Om vir inligting te lees  (Page 3/3)

Memorandum

AKTIWITEIT 1

Opsomming in eie woorde sover moontlik – geen hofies – een paragraaf.

Die opvoeder kan vooraf riglyne gee: soek die hoofgedagte in elke paragraaf en gee dit weer in vloeiende prosa (m.a.w. nie puntsgewys nie).

AKTIWITEIT 2

1. Die opvoeder sal, indien nodig, moet verduidelik wat ‘n e-posboodskap is. Die belangrikste aspek is dat dit kort en bondig moet wees en dat die voordeel daarvan die onmiddellikheid van die kommunikasie is. Aangesien hierdie ‘n bestelling is, moet die nodige afleweringsadres gegee word. Hier is dan die geleentheid om oor posadres, woonadres en werkadres te praat. ‘n Mens sou interessantheidshalwe ook die SMS-kultuur kon aanraak.

2. Voor die leerders self ‘n advertensie kan ontwerp, moet daar eers aktiwiteite rondom advertensie plaasvind om hulle op te skerp t.o.v. die voorkoms en inhoud van ‘n goeie advertensie. Hou dit eenvoudig en fokus op uitleg, grafika en kopie.

Die Ikapa-advertensies is treffend en sluit goed aan by die onderwerp; dit kan dus met vrug gebruik word. Wys op konsepte soos die logo en slagspreuke om die “produk” te vestig. Laat leerlinge vooraf voorbeelde klas toe bring om dit eers te ontleed en te bespreek. Laat hulle oor hul gunsteling-advertensies praat en sodoende uitpluis waarom die advertensies “werk”.

AKTIWITEIT 3

Eie vertaling. Die opvoeder moet vooraf vir die leerders verduidelik dat ‘n goeie vertaling die gees van die oorspronklike teks moet weergee en dat dit idiomaties korrek moet wees. Hierdie teks het nie ruimte vir nuansering nie, aangesien dit ‘n feitelike berig is. Daar kan aan die leerders verduidelik word dat die vertaling van ‘n literêre teks, soos bv. ‘n gedig, baie meer kreatiwiteit verg. Leerders word hier aangemoedig om woordeboeke te gebruik en indien nodig moet daar aan hulle verduidelik word hoe om naslaanboeke te benut. Die gebruik van die internet as bron moet ook aangeraak word.

AKTIWITEIT 4

Groepwerk. Die opvoeder stel riglyne vir die groep sodat groepleer optimaal benut kan word.

Vir bronne kan na die internet, asook na ou koerante (Januarie 2003) verwys word.

Ander leerareas word hier betrek. Die geleenthede vir kreatiwiteit is legio.

AKTIWITEIT 5

1. Ontkennende vorm

a) Mense is nie vir walvisse bang nie.

b) Daar is nie vissersbote in Houtbaai nie.

c) Dolfyne is nie aggressiewe diere nie.

d) Ek het nie geweet dat walvisse soogdiere is nie.

e) Mens mag nie net soveel krewe vang as wat jy wil nie.

a) Mense is bang vir walvisse.

b) Daar is vissersbote in Houtbaai.

c) Dolfyne is aggressiewe diere.

d) Ek het geweet dat walvisse soogdiere is.

e) ’n Mens mag net soveel krewe vang as wat jy wil.

• Kyk nou na die volgende voorbeelde:

Voorbeelde:

• Het jy al ooit ’n regte walvis gesien?Nee, ek het nog nooit ’n regte walvis gesien nie .
• Gaan jy soms in die vakansie see toe?Nee, ek gaan nooit in die vakansie see toe nie .
• Is daar altyd wolke op Tafelberg?Nee, daar is nie altyd wolke op Tafelberg nie . OF Nee, daar is nooit wolke op Tafelberg nie . ( Let wel : Die twee sinne hierbo het nie dieselfde betekenis nie. Verstaan jy hoe die betekenis verskil?)
• Is Van Hunks nog steeds op Tafelberg?Nee, Van Hunks is nie meer op Tafelberg nie .
• Is hier êrens ’n plek waar ’n mens kreef kan koop?Nee, daar is nêrens ’n plek waar ’n mens kreef kan koop nie .

• Skryf nou ontkennende antwoorde op die volgende vrae. Begin elke sin met “Nee, “:

a) Was jy al ooit op Robbeneiland?

b) Glo jy nog steeds dat Van Hunks en die duiwel ’n rookwedstryd gehou het?

c) Gaan julle soms Hermanus toe om na die walvisse te kyk?

d) Is daar êrens in die see ’n snoek wat 100kg weeg?

e) Speel jy altyd saam met die dolfyne as hulle so lekker in die water baljaar?