1.3 Is jy 'n wenner?

Lewensoriëntering

Graad 8

Persoonlike ontwikkeling: selfbeeld

Module 4

Is jy ‘n wenner?

Jy word wat jy dink...

Daar is 'n baie bekende gesegde wat vegetariërs graag gebruik as hulle met die gemiddelde karnivoor praat: "Jy is wat jy eet". Dink net hoe die vleisetendes voel as hulle dan agter so 'n sappige stukkie net-gaar biefstuk sit. Of wanneer die mes so sag deur 'n stukkie kalfsvleis gly. Dis mos om enige vleisetende skuldig te laat voel. Stem jy saam?

Daar is egter groot waarheid in die gesegde: "Jy word wat jy dink jy is”. Met ander woorde, jou denke bepaal dikwels wat van jou gaan word. As jy dink jy is dom, sal jy òf ongemotiveerd wees òf te bang om te probeer - en dan sal jy nie sukses behaal nie. Jou negatiewe verwagtinge word dus waar. As iemand aanmekaar vir jou sê jy is sleg of lelik, sien jy jou later deur so 'n persoon se oë, en jy voel dat jy sleg of lelik is. Dis nog gevaarliker as die stem wat vir jou sê dat jy nie die moeite werd is nie, jou eie is! Want vir wie kan jy glo as jy nie jouself kan glo nie? Daarom is dit noodsaaklik dat jy negatiewe gedagtes gou-gou moet hokslaan, sodat daar nie 'n negatiewe gedagtepatroon ontstaan nie. Jy moet jou dus daarop instel om positiewe selfspraak en positiewe gedagtes in die plek te stel van negatiewe denke.

Hier het ek nou 'n hele klomp woorde gebruik om 'n eenvoudige idee tuis te bring. So 'n “bek moet jêm kry” - of dalk 'n deksel? Al hierdie dinge beteken dat jy soos 'n wenner moet dink om 'n wenner te wees.

• Baie belangrik: wenners is nie altyd uitblinkers nie en uitblinkers is nie altyd wenners nie.
• As jy 'n realistiese standaard stel en bereik en gelukkig daaroor voel, dan is jy mos 'n wenner!

Kom ons kyk na die kenmerke van ’n wenner…

1 'n Wenner ontwikkel sy volle potensiaal

Dit beteken dat 'n wenner teen hom- of haarself kompeteer om die beste waartoe hy of sy in staat is, te lewer. Het jy jou beste gelewer as jy 100% kan kry in 'n vak, maar jy kry net 70% (en dit was nie 'n glips nie)? As jy 50% kan behaal en jy kry dit, dan is daar nie 'n probleem nie. Solank jy jou beste doen, is jy 'n wenner. Moet nooit 'n "minimum"-mens word nie.

• 'n Belangrike vraag: Presteer en leef jy volgens jou volle potensiaal?Wat sê die stemmetjie in jou binneste?
• Die volgende vraag sou wees: Wat keer jou om jou beste te lewer? Skryf gou voordat jy te diep dink!

Kom ons sit koppe bymekaar en kyk watter redes daar mag wees wat mense verhoed om hul beste te lewer.

Onthou

• Luister na mekaar.
• Stip die redes aan op 'n los vel papier voordat julle finaal besluit en dit oorskryf.
• Hou by die tyd wat die leerkrag of groepleier aandui.

Redes waarom mense nie hulle volle potensiaal ontwikkel nie:

• 'n Verskoning 'n dag word 'n sware vrag! Dink julle dis moeilik om te onderskei tussen geldige redes en verskonings?
• Kyk weer: watter van die redes is sommer verskonings en watter is geldige redes? Jy kan kleurpotlode gebuik om die verskille te merk.
• Wat is 'n verskoning? Wat van: Ek het die toets gedruip, want my ma wou my nie help nie. Of: Die onderwyser hou nie van my nie.
• Wat is 'n geldige rede? Ek het nie goed gevaar nie, want ek het baie siek gevoel op daardie oomblik.
• En wat dan? Dan kom jy met 'n teenvoorstel, soos: "Ek sal vra of ek weer kan probeer wanneer ek beter voel."[LU 3.1]