2.2 Om voor te berei vir die aktiwiteite deur reg op te warm  (Page 2/2)

[LU 4.1]

Hierdie dans moet in die klaskamer uitgevoer word. Let op die verskil in ruimte tot jou beskikking in verhouding tot die vorige dans.

Jy het ook ‘n lessenaar, tafel of stoel om mee te werk.

Jy kan musiek vir hierdie dans gebruik. R&B of Rock werk goed met hierdie dans. Kies musiek met ‘n definitiewe tempo.

 Probeer verkillende posisies met jou bolyf inneem, terwyl jy by jou lessenaar sit (bv. sit regop, buig vorentoe, buig na die kante).

 Probeer verskillende posisies met jou kop en nek inneem.

 Ondersoek verskillende armbewegings (bv. rigting, gebuig of reguit).

 Kies een kopposisie, liggaamsposisie en armposisie en kombineer die bewegings om ‘n sekwens te vorm.

 Probeer verskillende beenposisies inneem terwyl jy op jou stoel sit.

 Probeer in en om jou lessenaar beweeg (staan op jou stoel, sit op jou lessenaar, staan langs of agter jou stoel).

 Ontwerp ‘n kombinasie van al die bewegings en choreografeer jou eie stoeldans.

 Jy kan klank by jou dans voeg deur die tafel, stoel of vloer te gebruik om die tempo te hou (slaan met jou hand op die tafel, stamp met jou voete op die vloer).

 Voeg die klank en bewegings bymekaar.

AKTIWITEIT 4

OM NA DIE DANSAKTIWITEITE OP DIE REGTE MANIER AF TE KOEL EN TE STREK

[LU 4.1]

Dit is belangrik om die spiere wat jy gebruik het gedurende hierdie oefening te strek, anders sal jy stywe spiere vir omtrent drie dae hê.

Kies musiek met ‘n stadige tempo.

Asemhalingsoefening

• Staan met jou voete heupwydte van mekaar, arms langs jou sye.
• Asem in deur jou neus en lig arms bo jou kop.
• Asem uit deur jou mond, laat sak arms en buig terselfdertyd jou knieë
• Herhaal vier keer.

Nek strek

• Lig regterarm reguit op, sit jou arm oor jou kop en raak aan die linkerkant van jou kop.
• Trek jou kop stadig na regs en laat sak jou linkerskouer.
• Herhaal aan die linkerkant.

Kop en arm strek

• Strek arms reguit agtertoe en vat hande agter rug – maak borsarea oop en trek arms weg van jou lyf.

Rug en arm strek

• Bring arms vorentoe – vat hande saam – maak rug en skouerblaaie oop – trek maagspiere in – buig bolyf effens vorentoe – buig knieë effens – trek arms weg van liggaam – laat sak jou kop.

Hampees (“Hamstring”) strek

• Staan regop – bene effens van mekaar af – kruis een been oor die ander een – hou knieë reguit – bring bolyf stadig vorentoe en probeer die grond met jou hande raak.
• Ruil bene om om die ander kant te strek.

Quadriceps (Bo-been) strek

• Staan regop – voete heup-wydte apart – lig een been na agter – buig knie (hak na boud) – hou ondersteunende been effens gebuig – hou en trek voet na jou boud met jou hand – maak ander arm reguit na die kant vir balans.
• Ruil bene om.

Skud alle liggaamsdele los.

Herhaal asemhalingsoefening.

Hou alle strekke vir agt tellings.

Die afkoel en strek moet nie minder as drie minuteen nie meer as vyf minute duur nie.

Alle strekke moet stadig gedoen word.

Assessering

LU 4

UITDRUKKING EN KOMMUNIKASIE Die leerder is in staat om veelvuldige vorme van kommunikasie en uitdrukking in kuns en kultuur te ontleed en te gebruik.

Dit is duidelik wanneer die leerder:

DANS (4.1)

• op verskillende plekke (bv. binne en buite, in die klaskamer, op die verhoog, op hout, op sement, gras of in modder) dans, en beskryf hoe dans deur ritme en die fisiese omgewing beïnvloed word.